Монгол хонины ноосны дийлэнх хувийг буюу 45.8-59.6%-ийг цагаан ноос эзэлдэг нь ихээхэн ач холбогдолтой. Хонины цагаан ноосоор эсгийгээ хийж, гэрээ бүрж аж төрдөг монголчууд бид эсгий хийх нарийн технологитой.

Ноосноос эсгий гаргах арга нь ноосны ширхэгт олон дахин цохилт өгснөөр маш жижиг микро утсанцарууд ноосон ширхэгт үүсэж хоорондоо барьцалдсанаар эсгий бүтдэг.

Эрт дээр үеэс таван хошуу малыг гаршуулж, ашиг шимийг нь хүртэж ирсэн манай ард түмэн хонины ноосыг хувцас эдлэл, олс дээс, мал аж ахуйн хэрэгцээт зүйлс болон хамгийн ихээр гэрээ бүрж, дулаалгын материал болгон ашиглаж иржээ.