Кирилл уран бичлэгийг Монголдоо хөгжүүлэхэд өөрийн хувь нэмрээ оруулж яваа залуу уран бүтээлч  Д.Сайхансувдыг энэ удаагийн Оeo.mn-ийн зочиноор урин ярилцлаа. Уран бичмэлийг сонирхогч, уран бичмэлд хайртай уншигч та бүхэн маань шимтэн уншаарай.

Сайн байна уу танд энэ өдрийн мэнд хүргэе. Манай урилгыг хүлээн авч студид маань хүрэлцэн ирсэнд баярлалаа. Юуны түрүүнд та өөрийгөө манай уншигчдад танилцуулна уу.

• Сайн байна уу. Намайг Д.Сайхансувд гэдэг. Улаанбаатар хотод төрж өссөн хүн. Би 2006 онд МУБИС Дүрслэх урлаг дизайны багш мэргэжлээр төгссөн. Одоо Олон Улсын Улаанбаатар Их Сургуульд дизайны тэнхимд багшилдаг.

Та анх энэхүү Уран бичлэгтэй хэрхэн холбогдсон бэ?

Оюутан байхад Дашхүү гэдэг багш манай их сургуульд байдаг байлаа. Нэг удаагийн хичээл дээр Дашхүү багш урилгаар хичээл заах завшаан таарсан юм. Энэ нь шрифтийн хичээл байсан. Тэгээд бид нарт уран бичлэг гэж ийм шрифтийн төрөл байдаг гэдгийг хэлж өгч байсан. Багш маань нэг бичгийн цаасан дээр кирилл бичгээр ар өвөргүй биччихсэн том жижиг үсэгнүүд, үгнүүдийг бидэнд тарааж өгч байсан. Бид нар дуурайгаад бичиж эхэлсэн. Энэ нь надад их таалагдаж өвлийн амралтаараа их уйгагүй дуурайж бичиж эхэлсэн. Багш, бичвэрийг маань хараад “- Болж байна, цаашид энэ уран бичлэгийг хөгжүүлж явж болохоор байна” гэж урмын үг надад харамгүй хайрласан. Одоо ч тэр цаас нь надад байдаг, миний нандин зүйлсүүдийн нэгд тооцогддог. Багш минь одоо Бурхан болсон, тэнгэрт байгаа. Тэр үеэс хойш энэ тэнд захидал, өргөмжлөл төдийхөн хүний гуйсан зүйлийг л бичиж байсан болохоос төдийлөн энэ чиглэлээ хөгжүүлье гэж бодож байгаагүй юм байна лээ. Сүүлийн 2,3 жилийн өмнөөс энэ уран бичлэгийг урлаг болгон хөгжүүлж болох юм байна гэдгийг мэдсэн. Ингээд сонирхлоо гүнзгийрүүлж бүтээлийн чанартай зүйлсүүдийг хийж эхэлсэн. Мөн интернэт орчин, цахим сүлжээнээс энэ талаар дэлгэрүүлэн судалж, олон уран бүтээлч нартай нэгдэж гадны уран бүтээлч нараас суралцаж энэхүү авьяас чадвараа урлаг болгон хөгжүүлэхээр шийдээд явж байгаа.